Haglaub sogar minname fegässe

Woni im halbtunkel wider dussenufte chalte schteischtäge schtaan, mis hert chlopfende herz ide bruscht, fascht schtächend i mim hals, de pochendi schmerz im balle fominere rächte hand, es lächlenufmine lippe, fäderliächt, ganz schturm im chopf, da chanis gar nöd rächt glaube, dasi no foreme wiili, forere halbeneewikeit, for halbem mänschegedänke, am früenabig fodem taag, schomal da gschtande bin, imene tunklenegge fodem chalte gmüür, ussenadem hellerlüüchtete warme luschzaal, chli ferloore, chli fersunke, miklopfendem herz, de chalti schtei fode muur a mine fingerschpize, di chalte schtägetritt, ewig schattig, undermine sole.

wini de tüüfe männerschtimme gluuscht han, dur di tiki tüür obenade schtäge, am lache, am japse, schnure, fascht grööle. schweri mänschenam schtüelrüke, am umerangge, und iri händ, wo ufklöpft uf tischflächene und armläne und schänkel schlönd. fillicht ä schmaze untschluke. aa- und apseze fo bächer, wobim zueproschte schäppered, bim gfüllpwerde zisched und gluksed.

aber fasch presänter alsti lüütischte lacher und schprüchechlopfer e gwalltigi schtilli fo schtumme blik und schtillem erträäge, fo gfalltete händ i züchtige schööss, wo nerfösi tüüme über trocheni handrügge untschpröödi chnödli sch-triiched und riibed, bis thuut root und ruuch wird, sich enzünt und flammend brännt.

umwi augeblik schpöter di tiki tüür uufgangenisch und liächt is tunkle prochenisch unz tunkel feschnitte umpfeschüücht hät. wini e fertrouti männerschtimm minname ha ghöre säge umwinimi usem tunkle glöst han, is liächt. umwini di schtägetritt duruufgschtige und i dä waarmi saal träte bin, is hellenine, ipwärmi.

umwini dänn deet gschtande bin, alli ufmerksamkeit, alli blik ufmir, erwartixfoll, erfroit, chli gwundrig. undiich, min chopf xänkt, nur holzplanke, bälke, negel, teppich, fäli, schtuelbei und schuewerch im blik. ummini guete zwei füess unti tuusige fo schritt im räge, im schnee, im erschte tau, underde mittaxhiz. mini schweisstropfe, s bluepfode gschundne füess. unte schtaub fo fäldwäg und walpode, fodenänge gasse, fo all dene schtubene unkalte zimmerböde, beläpte fäschzääl untorfpläz.

untem plözliche tumult fodereneinte nacht. rüeffe untschreye dur tunkli, ferwinkleti gasse. trample und haschtix humple untumpfi schläg uf schädel umpei, wo berschted umpräched. wini grämpin, gflüchtet unti landschtraas im tunklenentlang girrpin. diä einti nacht. wini min liäbe gfärte wider gfunde han, am wägrand. umpforher di tääg, di zaalloose gmeinsame schritt uftene gwundene pfääd, mittem alte meischter, dem wurzelige mannli, wo scho lang fegässenisch umpfegässe wirzii, beforerno überhaupt chanerinnerepwerde. bluetüberschtrömt am wägrand sis zerschlagne xicht. unzis letschte, fersöönliche lächle im schwache schiin fomene füür.

winich nur all das for auge und im blik gha han, wärentiich mixänktem chopf daaschtaan for dere fäschxellschaft im luschzaal fodere burg, so hanidoch gschpüürt, ja gwüsst, dass au sii da isch. hanall di augepaar ufmir gschpüürt, ussert dem einte. all di auge, ussert iri zwei, womiich um kämpriis wänxee und wägglueged, scho immer wäggluegt händ, usem fänschter, is füür, ad schteiwänd, uft händ i irem schooss, uf knüü under irem rok, ja di zwei auge, wo am änd ufti gliiche bälkenumplanke lueged wi mini zwei.

und alsopsi userenandere wält a mis oor dringe wür, ghöri di schtimm, di fertrouti schtimm fodem guete maa, woso groossi schtük ufmich hept. womi aapriist for dere xellschaft fo eta­blierte, bessergschtellte, gleerte, sälpschpfeschtänd-lich wichtigere mänsche.

wasiich nöd alles chöni. das erfaapme daa ide woolformulierte wort fodem groosse herr fonn und zu, wo usem schwärme garnüm schiint usezcho. ich chami nöpeklage, aber wool ischsmer nöd, ich hebe min blik xänkt. unkönti mittenoore wägglose wimittenauge wäggluege, ich würs mache.

untoch bini froo, ischemene mänsch s wägglose nöd gänzlich möglich. welso weisi ganzicher, dass au wänn das eintenaugepaar mich keines blikes würdigt, mich jeemals wänn, dänn nur im gheimschte, mittemenumbemerkte siiteblik, ä nur einisch für tlengi fo eim einzige wimpereschlag überhaupetrachtet hät, so chönd au diä zwei oore nöd wägglose.

unkonzentrierezisich na so ufs knischtere unz zischenim füür, ufs ruuschenide boim, ufs knarze fode diile, ufs ranggenumpfurze under tikem tuech i polschtereti sizchüssi. umwisteneinte uufschtoosst unzti anderenabeschluked untebi schnufed und schnaubed. au sii ghört jez, wer ich bin. wer de groossi johannes hadlaub, luut dem guete maa, sölli si.

unno befori es erschz mal min blik hebe, bemerki im nechschte momänt es tiks buech, i tikem läder iigfasst, mis blikfäld iinä. xee mini beide händ ummini tüüme de läderiiband umfasse. gschpüüre sgwicht imine händ. sgwicht fonere ferantwortlichkeit, fonere pflicht, fominere beschtimmig, mimeinundalles. gschpürs i minere hand undufmine schultere.

es gwicht, wojez ganz wäggblaasenisch, jez, woni da wider schtaane, ufte schtäge, ussenadem saal, hinder ferschlossener tüür, im tunkle, umgää fodem chalte schtei. wi in luft uufglöst, das gwicht. alles fäderliächt. de pochendi schmerz im hampalle, s pumpende herz i minere bruscht.

und winen fuessaptruk i sumpfigem bode, wi schpizigi negel i fasrigem holz, wi iri schtarche zää i mim weiche fleisch, tüüf i minerenerinnerig das bilpfo irem haaraasaz, e hampreit formim xicht. iri fiine, maakelloose haar forminenauge. irenumfegliichlichi duft i minere nase unte schtächendi schmerz fo irem biss i mim fleisch, im muskel fomim hampalle. dä schmerz, wo durmis hangglänk raast, durmin arm bis ufenitschultere.

und augeblik schpöter iri wiituufgrissne, apsich sälber ferschrokenenauge, bedroolich am funkle. ire fascht irri blik, iri füürrote bagge. mis roote bluet uf irne zää, uf irne lippe. und iri zunge, wo rasch drüberine faart ummis bluet schmökt, ja schmöke mus.

ich cha mis glük nöpfasse. schtaanufte schtäge, alles jez hinder und alles no for mir. mis hüpfende herz, mini berschtendi bruscht. iri zää en tüüfenaptruk ide huupfominere hand, e präägig i mim fleisch, es ferschpräche, e gwüssheit. ich binöpper für sii, bi fäderliächt, bi fröölich zittrix laub. ich schwebe, tanze im chalte lufzug fodem schattige gmüür.